2 Chronicles 34

Imvuselelo kaJosiya

1UJosiya waba yinkosi eleminyaka eficamunye ubudala njalo wabusa eJerusalema okweminyaka engamatshumi amathathu lanye. 2Wenza ukulunga phambi kukaJehova njalo wahamba ngenyathelo likayise uDavida, kazange aphambukele kwesokudla loba esokhohlo.

3Ngomnyaka wesificamibili wokubusa kwakhe, elokhu esesengumntwana, waqalisa ukumdinga uNkulunkulu kakhokho wakhe uDavida. Ngomnyaka wetshumi lambili waqalisa ukuhlambulula elako-Juda laseJerusalema, wavala izindawo zokukhonzela, izinsika zika-Ashera, izithombe ezibaziweyo lezikhandiweyo. 4Ngeziqondiso zakhe kwabhidlizwa ama-alithare aboBhali; waqoba ama-alithare empepha ayengaphezu kwawo; wahlikiza izinsika zika-Ashera, izithombe kanye lemifanekiso. Lokhu wakuvidliza wasekuchithizela phezu kwamangcwaba alabo ababenikele imihlatshelo kulezozithombe.

5Watshisela amathambo abaphristi emaalithareni abo, ngalokho wahlambulula elakoJuda laseJerusalema. 6Emizini yakoManase, lako-Efrayimi lakoSimeyoni, kuze kuyefika koNafthali, lasemanxiweni aseduzane layo, 7wadiliza ama-alithare lezinsika zika-Ashera njalo wahlifiza izithombe zaba yimpuphu wachithiza ama-alithare empepha kulo lonke elako-Israyeli aba yizicucu. Wasebuyela eJerusalema.

8Ngomnyaka wetshumi laficamibili wokubusa kukaJosiya, ukuze ahlambulule ilizwe kanye lethempeli, wathumela uShafani indodana ka-Azaliya loMahaseya umbusi wedolobho, loJowa indodana kaJowahazi, umlobi, ukuba bavuselele ithempeli likaJehova uNkulunkulu wakhe.

9Baya kuHilikhiya umphristi omkhulu bamnika imali eyayilethwe ethempelini likaNkulunkulu, eyayiqoqwe ngabaLevi ababengabagcini beminyango beyiqoqa ebantwini bakoManase, lako-Efrayimi layo yonke insalela yabako-Israyeli lakubo bonke abantu bakoJuda labakoBhenjamini lababehlala eJerusalema. 10Basebeyiqhubela amadoda ayekhethelwe ukukhangela ukuqhubeka komsebenzi wasethempelini likaJehova. Lamadoda ayeholisa ababevuselela lokwakha kutsha ithempeli. 11Eyinye bayiqhubela ababazi labakhi ukuze bathenge amatshe abaziweyo lezigodo lezintungo zezindlu ezadilika amakhosi akoJuda engananzelele.

12Amadoda ayisebenza imisebenzi yawo ngokwethembeka. Ayekhokhelwa njalo eqondiswa ngoJohathi lo-Obhadiya, abaLevi bosendo lukaMerari, uZekhariya loMeshulami abosendo lukaKhohathi. AbaLevi bonke ababengamagabazi kwezamachacho omculo –

13babephethe izisebenzi njalo bekhangele izisebenzi kulowo lalowo umsebenzi. Abanye abaLevi babengonobhala, labalobi kanye labalindi beminyango.

Ukufunyanwa KoGwalo Lwemithetho

14Besakhipha imali eyayingeniswe ethempelini likaJehova, uHilikhiya umphristi wafumana uGwalo loMthetho kaJehova owawuphiwe uMosi. 15UHilikhiya wathi kuShafani unobhala, “Sengilutholile uGwalo loMthetho ethempelini likaJehova.” Waselunika uShafani.

16Ngalokho uShafani waluthatha walusa enkosini wayibikela wathi: “Izikhulu zakho ziyakwenza konke ozilaye ukuba zikwenze.

17Sebeyibhadele imali leyo eyayisethempelini likaJehova njalo sebeyitshiyele abakhangeli bomsebenzi kanye lezisebenzi. 18Ngakho uShafani unobhala wabikela inkosi, wathi, “UHilikhiya umphristi usengiphe ugwalo.” Ngakho uShafani waselubala phambi kwenkosi.

19Inkosi yonela ukuzwa amazwi oMthetho, yadabula izambatho zayo 20yapha leziziqondiso kuHilikhiya, lo-Ahikhamu indodana kaShefani, lo-Abhidoni indodana kaMikha, loShafani unobhala kanye lo-Asaya inceku yenkosi yathi: 21“Hambani liyengibuzela kuJehova lensalela yako-Israyeli labakoJuda ngalokhu okulotshwe kulolugwalo olutholakeleyo. Lukhulu ulaka lukaJehova phezu kwethu ngenxa yabokhokho abangazange balilalele ilizwi likaJehova; kabenzanga ngendlela okulotshwe ngayo kulolugwalo.”

22UHilikhiya lalabo ayethunywe labo yinkosi bahamba ukuba bayekhuluma loHulida umphrofethikazi owayengumkaShalumi indodana kaThokhathi, indodana kaHasira, umlondolozi wezambatho. UHulida wayehlala eJerusalema endaweni yeSiqinti Sesibili.

23Wathi kubo, “Nanku okutshiwo nguJehova, uNkulunkulu ka-Israyeli, uthi: Tshelani umuntu olithume kimi lithi, 24‘Nanku okutshiwo nguJehova uthi: Ngizakwehlisela lindawo labantu bayo incithakalo lazo zonke izethuko ezilotshiweyo egwalweni olufundwe phambi kwenkosi yakoJuda. 25Ngoba bangidelile batshisela abanye onkulunkulu impepha njalo bangithukuthelisile ngakho konke abakwenze ngezandla zabo, ulaka lwami luzakwehlela phezu kwalindawo njalo aluyikucitshwa. 26Tshelani inkosi yakoJuda, elithume ukuzabuza kuJehova lithi: ‘Nanku okutshiwo nguJehova, uNkulunkulu ka-Israyeli, mayelana lamazwi owezwileyo: 27Njengoba uzisolile wazehlisa ngaphansi kukaNkulunkulu wezwa ukuthi utheni ngalindawo labantu bayo njalo langenxa yokuthi uzehlisile wazithoba phambi kwami wadabula izambatho zakho walila phambi kwami, ngikuzwile, utsho njalo uJehova. 28Wena ngizakususa ngikuse kubokhokho bakho, njalo uzangcwatshwa ngokuthula. Amehlo akho awayikubona leyoncithakalo engizayehlisela indawo le lakulabo abahlala khona.” Ngempela bayithatha leyompendulo baya layo enkosini.

29Inkosi yasimema bonke abadala bakoJuda labaseJerusalema. 30Yaya ethempelini likaJehova labantu bakoJuda, kanye labaseJerusalema, labaphristi kanye labaLevi labantu bonke kusukela komncinyane kusiya komkhulu. Inkosi yabafundela wonke amazwi ayeseGwalweni lweSivumelwano, olwalufunyenwe ethempelini likaJehova.

31Inkosi yema ensikeni yayo yavuselela isivumelwano sayo phambi kukaJehova – ukumkhonza uJehova lokwamukela imilayo yakhe, leziqondiso, lezimiso zakhe ngenhliziyo yayo yonke langomphefumulo wayo wonke, lokulalela amazwi esivumelwano esilotshiweyo ogwalweni. 32Yasifungisa bonke ababeseJerusalema labakoBhenjamini ukuba bazasigcina; abantu baseJerusalema bakwenza lokho belandela isivumelwano sikaNkulunkulu, uNkulunkulu wabokhokho babo.

33UJosiya wasusa zonke izithombe ezenyanyekayo ezabelweni zonke ezazingezako-Israyeli, wenza bonke abako-Israyeli bamkhonza uJehova uNkulunkulu wabo. Ngezinsuku zokuphila kwakhe kazange aphambuke endleleni kaJehova uNkulunkulu waboyise.